Kan Kong

Donnak i chim cang bang khan ICBC cu Bawipa sunpar langhter kau ah tlang cung i tlaak mi khua bantuk si seh law zei hmanh nih phen hlah seh ti saduhthah mi bu a si. Nun diriamhnak a ngei lo mi i Bawipa an ton nak si seh law, nun ti a haal mi i nunnak cerhti an than nak si seh ti hi kan saduhthah a si.

Krifabu tampi hi 'anih nih a dirh' ti a um tawn i, ICBC hi cu misawhsawh tete thlacamnak thlaici a kho mi a si ca ah "anih dirh mi", "anih bu" ti awk a um lo mi a si. Lung pumpaluk he aa tel mi poh ICBC a ngei tu cu aa si ko.

Pathian nih lam a kan hruai i, misantlai zong a kan pek ciahmah i, ICBC cu hruaitu rinhcanh tlak tlak nih an kilhkamh. Hruaitu a ttuan kho ding, hman rih lo mi zong kan ngei rih hna. Cun, rian phunphun fial awk minung kan ngei hna--cozah phung lei, theology lei, sianginkai lei, ca le holh lei, computer lei, zei lei poh te ah bochan awk Pathian nih a kan pek. Cun thlarau thazaang a kan pe kho ding mi zong zeimawzat kan ngei hna. Cuca ah, thlarau lei si seh, vawlei lei in si seh, Pathian nih a fale hmang in kan herhpang a kan khaanpiak lai ti hi kan zumh.

Chungtel zong tam chin lengmang Pathian nih a kan pek. Bu ngakchia te a si bu ah North America i Laimi krifabu ah terual bik pawl kan si. Chungtel hi a milu in 800 ringlo kan si cang (tipil ing cia lawng). Pathian nih rian nganpi fial a kan duh i a si lai ti kan zumh.

Bawipa dawtnak le lawmhnak kan sin i ra ihrawm ve ding in kan in sawm hna. Bawipa nan zulh nak ah nan lam tluang ko seh.