Hawile hna,

Indianapolis i tuah lio mi crusade cu aa peh ciahmah ko i thla campiak kan herh ko. Atu hi zan ruk nak a si cang. Atu tan hi Indianapolis Laimi sin ah Pathian aa langh lai tiah ruahchannak tampi kan ngei. Aziah tiah atu tan tluk i crusade i no le tar kan lung a thawh hi a um bal lo, Indianapolis ah. Mahtluk i Pathian bia ngaih kan ibiatak zong a um tuk bal rua lo ti ruah in ka ruat. Tuzan hawihna cu ka luh ah an rak tthu dih cang i, ka von hmuh hna bak in kaa lawm tuk colh. Indianapolis Laimi hi Pathian bia an duh lo taktak tiah ka ti tawn i, tuzan cu Thiang Thlarau nih mi tampi a rak kanh hna rua ka ti.

Mino ko nih kan lung an ka lawmhter. Tianzan le zahan hawihna kha cu mino lawngte ngawt an si. Kan speaker zong aa lawm tuk ve. "Rangoon hmanh ah crusade tuah usi law mino mah zat an rat ka zum lo; hika ngaite i mino mah zat nan rat hi cu ka lung aa lawm taktak" a ti. Pathian bia ngaih ruah bakte i ngakchia mino tete cauk le cafung le Baibal te he mah lungtho te bak i an rat cu lung aa lawm kho tuk. Nuamh apel hmanh a um lo mi, bia ngaih lawng bak a si mi, i ngakchia mino (teenagers) mahti te i an rat le tthako te i bia an ngaih cu duh a nung taktak ko. Ngaknu-tlanval pah nak zong ah hmang hna hlah. An ra, an lut, an tthu, bia an ngai, thla an cam, hla an sa, an tho, an ttin. Mah vial. Nuamh ruah ah an ra rua ti awk a um lo. Leng no te pakhat nih nikhatzan kan cawn mi note a laak mi ICBC group ah a kan taarpiak i ka benh hmanh lai:

Minung lei in.........

1.) Nawlbia kan zul kho lo. (Rome 3:19,20) ; (Galati3:10, 22)
2.) Kan mah tein kan sualnak kan thianh kho lo. (Jeremiah2:22) ; (Isaiah 64:6, 43:25)
3.) Kan mah tein kan i tlan kho lo. (Salm 49:7,8) : (1Peter 1:18,19)       

Pathian lei in........ 

4.) Pathian thiannak ruang ah. (1 Peter 1:15,16) ; (Isaiah 6:1-8) 
5.) Pathian dinfel nak ruang ah. (Deutronomi 32:2) ; (2Timote 2:12-13)
6.) Pathian dawtnak ruang ah. (1 Johan 1:8,10,19) ; (Rome 5:6-8)

Minung lei in.....

* Isarel mi nih an sualnak anmah tein an i khamh khawh lo bantukin, minung nih sualnak chung in kanmah tein kan i khamh kho lo.
*(Luke 14:17) ; Khamh nak cu rawl-ei sawm bantuk si, mah nih tha va chuah len a hau lo.
* Thlarau a thi mi cu mah tein i khamh khawh a si lo, thlarau zungzal nunnak pe kho tu Pathian lawng lawng nih luatnak, khamh nak a kan pek khawh.  
* Nawlbia cu X-ray zaih-tu sayate bantuk asi. Nawlbia nih kan sualnak vialte a phuan dih.
* Minung hi a hohmanh tthat lo nak tuah bal lo, a sual bal lo kan um lo.
* Sualnak cu zeitik hmanh ah tthatnak nih a leh-rulh kho bal lo i, a thianh kho bal fawn lo.
* Kan mah tein kan i tthat ter, kan i thian ter ko hmanh ah, a thiang mi Pathian hmai ah cun fih nung, ningzak kan si tthiam ko.
* Na sualnak cu chat-phiat bantuk in thianh i tim hmanh law, santlai lo pawkpawlawng si ko lai.
* Kan sualnak cu kan thiamnak, kan felnak nih a thianh/leh-rulh kho bal lo.

Pathian lei in......

* (Habakuk 1:13) ; Sualnak zoh nak ah Pathian mit cu a thiang tuk.
* Pathian thian-nak hen i tahchunh ah cun minung i ka thiang aa ti mi tehna cu chimtlak si lo.
* A thiangmi mit nih hmunthur pel te hmanh a rem lo bantuk in, a thianghlim tuk mi Pathian nih sualnak hnawm pakhat zong a rem lo.
* Minung sualnak hi thianh hmasa lo ah cun, vancung chiah tlak pakhat hmanh kan um lo.
* Pathian cu amah le mah aa hleng kho lo, zeicahtiah a thiang-hlim mi Pathian a si caah si.

                         Mah vial hi ka ttial khawh tawk sisehlaw, a thawngttha chim tthat tuk nak ah notes laak caan zong ka ngei set lo. Kaan siaherh ngai hna, a paam tak ka ti caah ka ti khawh tawk ka hun in hrawmh ve hna. Pathian bia a si caah, ka palh nak um hmanh ah a tthat nak lei in nan ka hmuhpiak cio nak lai a reltu hawidawt pakhat cio nawl kan duh hna. Pathian nih pakhat cio nan rianttuan, nan umkal nak ah in hup-pheng cio hram hna seh. ---Lidy Mawi

Tuzan [July 27 zan] tu cu nutung patung zong an tam ngaingai cang. Patling hmai cang cang, nutung hmai ttial ttial. Krifabu hruaitu bochan tlaktlak zong Cerhti Nung an ra than cio. Mah ko cu kan duh. Tuzan hi gym hall ah kan ipum. Tthutdan minung 30 tlum tlang hra an chiah. Kan khat dih. Aa tlum lo tlawmpal hnulei ah an tthu. [Hmanthlak ah hin a tlawm kan lo, ataktak ah kan tlawm lo.]

Khua ka hei zoh ah, keimah chin hmanh ka um na'n, a hnabei a dong cang rua ti i ka ruah hrulh mi, zu i a ei dih nawn cang mi, Pathian bia ngaih zuam dawh i kan rak rel ti lo mi, nun a rocar cang mi, tehna ka hmuh hna. Bawi Zisuh cu nun hnabeidong pawl ca ko ah cun si fam kaw an ra fuuk cio. [Atang hmanthlak i hngawng ttemtunh pa zong hi a tlonleen nak ah accident faak taktak a tong i Bawipa a rak fuuk mi a si. Zan khat hmanh crusade a hrelh lo. Atu a pum a pe.]

Pianthar hi an rak duh tuk cio. An piangthar kho lo. Lung ithlen an duh tuk. An ithleng kho lo. Nun ithlen an duh tuk cio. Anmahte'n an ithleng kho lo. An nun an fih tuk cio cang. An hlaw kho lo. Pathian bia nih kan thleng seh ti an duh tuk. Mithar si an duh tuk cio. Zisuh nih mithar ah kan chuah seh ti an duh tuk cio.

Biakin kan ngeih lo ca ah hmun thum/li ah kan itthial cang. Aircon um lo nak le sound system a um cia lo nak tehna ah a si i, tthal khualin lak i si a vangh hlei ah, biachimtu bia a fiang tuk lo i a ngaih a har nawn. Mah na cun, khualin zeirello in an ra. Mic fiang lo pi cu an hna an chit rumro i an ngaih (kei cu a bia ka theih lo mi a tam pah). 

Kan speaker hi mithluakttha (genious), biachim thiam, piangthar a si hlei ah cathiam sang a si i, Lai khuate tthang ca'h si seh, siangin kai mi hna ca ah si seh, piangthar ca'h si seh, aho ca poh ah a sol lo mi a si. Mah ca'h cun cawnsang mi zong nih a bia ngaih tlak ah rel cio a si i upat cia in fuh zong a si. Mah hlei ah, secular lei i cawnsang cia kan ti cu a biachim aho ca poh ah an sol lo. Mah nih cun kan dihlak a kan sawm khawh. Si hmanh seh, bia thiam le cawnnak saan nih mi a thleng kho theng lai lo. Pianthar biachim zong nih a kan chei theng lai lo. A kan thleng kho tu ding taktak cu Thiang Thlarau lawng lawng a si lai. Mah ca'h cun Thiang Thlarau kan co cio dih nakhnga, Penticost ni bantuk i revival a tlun nakhnga thla rak campiak cio kan herh.

Mah le inn cio in, mah le rianhmun cio in, mah le khuallam cio zong in leicung khuaza Laimi nih thla nan rak kan campiak cio ah cun mitam nan thlacam caan cu aa peh lai i cikcin thlacam ah a cang ko lai. Thla nan kan campiak cia nak thawng hmanh hin, atu tiang kan crusade a tluang ngaingai. A karlak ah thihloh le poipang a um lo. Mualpho le lung nuamh lo zong a um rih hin lo. Kan speaker zong a ngan a dam. Tuzan hawihna cu pumpek a duh mi an tampi cang i hmai ah an chuak leen cang. Bawipa sunpar a lang rih lai.

"Cun cu hnuah cun, mi vialte ka thlarau ka toih hna lai i
Nan fapa le nan fanu nih ka bia an chim lai,
Tar nih mang an manh lai i
Nan tlangval nih langhnak an hmuh lai."

Joel 2:28